म्हणून दिग्दर्शक धोंडिबा कारंडे यांना बसला सुखद धक्का !!!

आज १२ वर्षांहून अधिक काळ 'झी टॉकीज' वाहिनी प्रेक्षकांचे मनोरंजन करत आहे. निरनिराळे सदाबहार चित्रपट, विविध कथाबाह्य कार्यक्रम, नाटकं अशा दर्जेदार कलाकृतींची पेशकश झी टॉकीज करत आले आहे. याशिवाय नवनवीन चित्रपटांचे 'वर्ल्ड टेलिव्हिजन प्रीमियर' सुद्धा या वाहिनीवर पाहायला मिळतात. 'झी टॉकीज' वाहिनीवर कुठल्या सिनेमाचा प्रीमियर होणार, याची प्रेक्षक आतुरतेने वाट पाहत असतात. उत्साही प्रेक्षकांचा रसभंग होणार नाही याची काळजी नेहमीच ही वाहिनी घेत असते. येत्या रविवारी, म्हणजेच २४ नोव्हेंबर रोजी, 'पळशीची पीटी' या सिनेमाचा वर्ल्ड टेलीव्हिजन प्रीमियर वाहिनीवर होणार आहे. 

'पळशीची पीटी' हा वेगळ्या विषयावरील आणि सत्य घटनेवर आधारित चित्रपट आहे. अनेक राज्य व राष्ट्रीय पातळीवर विविध पुरस्कार मिळवण्यात या चित्रपटाला यश मिळाले आहे. महाराष्ट्र शासनाचे उत्तमोत्तम पुरस्कार या सिनेमाला मिळाले. धोंडिबा कारंडे यांना पदार्पणातील सर्वोत्तम दिग्दर्शक म्हणून महाराष्ट्र शासनाचा पुरस्कार देण्यात आला. मुख्य भूमिकेत असलेली किरण ढाणे हिला सर्वोत्तम अभिनेत्रीचा सुद्धा पुरस्कार मिळाला आहे. या चित्रपटासाठी आणखी एक मानाची बाब होती, ती म्हणजे 'कान्स'साठी झालेली निवड! हा क्षण फारच नाट्यमय ठरला. 'पळशीची पीटी'ची कान्ससाठी निवड झाली आहे असा फोन आला त्यावेळी दिग्दर्शक कारंडे रिक्षात होते. अशावेळी फोन आल्यावर, सुरुवातीला खरंतर त्यांचा या बातमीवर विश्वासच बसला नाही. त्यातच, हा फोन १ एप्रिलला आलेला असल्याने, ही 'एप्रिल फूल'साठी करण्यात येणारी मस्करी तर नाही ना, अशी शंका सुद्धा त्यांना येत होती. अर्थात, खरोखरच 'पळशीची पीटी'ची निवड झालेली होती. ही बातमी ऐकून सगळ्यांनाच आनंद झाला. भरपूर पुरस्कारप्राप्त असा हा दर्जेदार चित्रपट 'झी टॉकीज'वर पाहायला मिळणार आहे. येत्या रविवारी दुपारी १२ आणि संध्याकाळी ६ वाजता पाहायला विसरू नका, 'पळशीची पीटी'!!!