तुम्हाला तुमच्या आसपास किंवा तुमच्या स्वतःतच हा लकी दिसेल - अभय महाजन

१० नोव्हेंबरला 'झी टॉकीज' वाहिनीवर 'लकी' या चित्रपटाचा 'वर्ल्ड टेलिव्हिजन प्रीमियर' होत आहे. निरनिराळ्या वेबसिरीज, हिंदी आणि मराठी चित्रपटांमधून आपल्या अभिनयाची एक वेगळी छाप पाडणारा अभिनेता अभय महाजन यात मुख्य भूमिकेत पाहायला मिळेल. त्याच्याशी या चित्रपटाच्या निमित्ताने गप्पा मारल्या. 

१. चित्रपटातील भूमिकेचे तुझ्याशी काही साधर्म्य आहे का?

या भूमिकेशी अभयचं काही साम्य आहे, असं म्हणता येणार नाही. लकी या भूमिकेपेक्षा मी खऱ्या आयुष्यात फारच वेगळा आहे. पण, आपण भाग्यवान असणं किंवा कमनशिबी असणं हा आपल्या आयुष्याचा एक महत्त्वाचा भाग असतो. आयुष्यात नशिबाची साथ मिळणं या गोष्टीशी मात्र मी सहमत आहे. या एका गोष्टीचा विचार केला, तर अनेकांच्या आयुष्याशी ही भूमिका साधर्म्य साधते.

२. मराठी सिनेसृष्टीतील अप्रतिम दिग्दर्शक संजय जाधव याच्यासोबत काम करण्याचा अनुभव कसा होता?

संजय दादा ज्याप्रकारचा सिनेमा करतो, त्याप्रकारचे चित्रपट सगळेजण करू शकत नाहीत. दोन वेगवेगळ्या पिढ्यांमधील काम संजय दादाने पाहिलं आहे. सिनेसृष्टीत तांत्रिकरित्या होत गेलेले बदल त्याने अनुभवलेले आहेत. त्यामुळे त्याच्यासोबत काम करण्याचा अनुभव खूपच वेगळा होता. तो कुणाशीही पटकन मैत्री करू शकतो, त्यामुळे त्याच्यासोबत काम करत असताना, दिग्दर्शक आणि कलाकार एवढंच नातं उरत नाही. साहजिकपणे काम अतिशय चांगल्याप्रकारे होतं. 

३. सहकलाकारांसोबत काम करत असतानाचे काही अनुभव आम्हाला सांगशील का?

मुख्य भूमिकेत असलेली दीप्ती ही दक्षिणेतील गुणी अभेनेत्री आहे. पण, आम्ही एकत्र काम केलेलं नव्हतं. तिच्यासोबत काम करण्याचा अनुभव वेगळा ठरला. माझ्या मित्राची भूमिका साकारणारा मयूर मोरे हा माझा खूप चांगला मित्र आहे. त्यामुळे काम करताना फारच मजा आली. काही कलाकार हे विशिष्ट प्रसंगांसाठीच या चित्रपटात होते, पण त्यांच्या कामाची भट्टी सुद्धा उत्तम जमून आली. त्यामुळे त्यांच्यासोबत काम करताना सुद्धा निश्चितपणे मजा आली. 

४. चित्रीकरणादरम्यानचा एखादा मजेदार किस्सा किंवा आठवण आम्हाला सांग.

सिनेमाच्या पोस्टरवरच मी टायरमध्ये पळताना दिसत आहे. त्या प्रसंगाचं चित्रीकरण हाच माझ्यासाठी अविस्मरणीय अनुभव आहे. गोव्यात, पणजीसारख्या ठिकाणी, ऑक्टोबर महिन्यात भर उन्हात मी रस्त्यावरून टायर लावून पळत होतो. चित्रपटात एकही असा प्रसंग नाही, ज्यात लकी नाही. त्यामुळे खूप दमछाक झाली. पाळायचे खूप प्रसंग या सिनेमात आहेत, त्यामुळे उन्हात पाळायची वेळ अनेकवेळा आली. एकाबाजूला दमछाक करणाऱ्या या गोष्टी मजेदार आठवणी सुद्धा ठरल्या आहेत. कारण काम खूपच मनापासून एन्जॉय करायला मिळालं आहे.

५. हा वेगळ्या धाटणीचा सिनेमा प्रेक्षकांनी का पाहावा असं तुला वाटतं?

तुम्हाला तुमच्या आसपास किंवा कधीकधी तुमच्या स्वतःतच हा लकी दिसेल. हा एक अत्यंत मजेदार आणि भरपूर करमणूक करणारा चित्रपट आहे. रविवारी १० नोव्हेंबरला 'झी टॉकीज'वर दुअप्री १२ आणि संध्याकाळी ६ वाजता हा चित्रपट बघायला मिळेल. हा चित्रपट प्रेक्षकांना भरपूर हसवणार असल्याने, दिवसातून दोनदा सुद्धा सगळेजण एकत्र बसून या चित्रपटाचा आस्वाद घेऊ शकता. अधिकाधिक लोकांनी, ही संधी साधून हा सिनेमा अवश्य पहा.