नोव्हेंबरच्या पहिल्या रविवारी 'झी टॉकीज'वर होणार 'जयजयकार'!!!

आज दहा वर्षांहून अधिक काळ 'झी टॉकीज' वाहिनी प्रेक्षकांचे मनोरंजन करत आहे. निरनिराळे सदाबहार चित्रपट, विविध कथाबाह्य कार्यक्रम, नाटकं अशा दर्जेदार कलाकृतींची पेशकश झी टॉकीज करत आले आहे. याशिवाय नवनवीन चित्रपटांचे 'वर्ल्ड टेलिव्हिजन प्रीमियर' सुद्धा या वाहिनीवर पाहायला मिळतात.'झी टॉकीज' वाहिनीवर कुठल्या सिनेमाचा प्रीमियर होणार, याची प्रेक्षक आतुरतेने वाट पाहत असतात. उत्साही प्रेक्षकांचा रसभंग होणार नाही याची काळजी नेहमीच ही वाहिनी घेत असते. येत्या रविवारी, म्हणजेच ३ नोव्हेंबर रोजी, 'जयजयकार' या सिनेमाचा वर्ल्ड टेलीव्हिजन प्रीमियर वाहिनीवर होणार आहे. 

'जयजयकार' ही निवृत्त आर्मी मेजर आखंडे यांची कथा आहे. निवृत्तीनंतर बालिश चाळे करून आखंडे गावकऱ्यांना त्रास देत आहेत. त्यांच्या मनोरंजनासाठी संपूर्ण गावाला वेठीस धरण्याचा मूढपणा ते करत असतात. मावशी, राणी, चंपा आणि लज्जो यादेखील चित्रपटातील मुख्य भूमिका आहेत. रेल्वे गाड्यांमध्ये भीक मागून ही मंडळी आपली उपजीविका चालवत आहेत. गाडीतील प्रवाशांसोबत झालेल्या भांडणामुळे एकेदिवशी हे चौघे तिथून पळ काढतात. आसरा शोधात हिंडणारे हे चौघे जण आखंडे त्यांच्या घरी पोचतात. वातावरण निवळेपर्यंत आखंडे यांच्या घरी त्यांना आसरा मिळतो. मात्र घरून ते निघून गेल्यानंतर, आपल्या घरातील अंगठी गहाळ झालेली असल्याचं मेजर साहेबांच्या लक्षात येतं. ही अंगठी परत करण्याची मागणी आखंडे त्यांच्याकडे करतात व तिथून कथानक निराळे वळण घेते. समाजातील अत्यंत दुर्लक्षित घटकांमध्ये मोडणाऱ्या या चौघांचा सांभाळ करण्याचा निर्णय मेजरसाहेब घेतात. या त्यांच्या निर्णयामुळे सर्वांच्या आयुष्यात कशाप्रकारे फरक पडतो, हे या सिनेमात पाहायला मिळणार आहे.

समाजातील दुर्लक्षित लोकांकडे पाहण्याचा एक निराळा दृष्टिकोन मिळवण्यासाठी हा सिनेमा नक्कीच पहा. ३ नोव्हेंबर रोजी, आपल्या सर्वांच्या लाडक्या 'झी टॉकीज' वाहिनीवर हा चित्रपट पाहण्याची संधी मिळणार आहे.