मिफ्फ 2020 साठीची उलटगणतीसुरु

मिफ्फ 2020 साठीची उलटगणती सुरु,

साप्ताहिक चित्रपट महोत्सवाला उरले केवळ आठ दिवस

ऑनलाईन सदस्यनोंदणी उत्साहात सुरु

महोत्सवाचे उद्‌घाटन 28 जानेवारीला तर सांगता 3 फेब्रुवारी 2020 ला नेहरू सेंटर सभागृह, वरळी येथे

फिल्म्स डिव्हिजन व्यतिरिक्त तीन विविध ठिकाणी चित्रपटांचे विशेष शो आयोजित

मुंबई, 21 जानेवारी 2020

भारत आणि जगभरातील चित्रपटरसिक ज्याची आतुरतेने वात बघत असतात, असा 16 वा मुंबई आंतरराष्ट्रीय चित्रपट महोत्सव (माहितीपट, लघुपट आणि ॲनिमेशनपट) 2020 चे उद्‌घाटन येत्या 28 जानेवारी 2020 रोजी वरळीतील नेहरु सेंटर सभागृहात संध्याकाळी 5 वाजता होणार आहे. सात दिवस चालणाऱ्या या महोत्सवाची सांगता आणि पुरस्कार वितरण समारंभ देखील त्याच सभागृहात 3 फेब्रुवारी 2020 रोजी संध्याकाळी 5 वाजता होईल. बिगर-चित्रपट श्रेणीतल्या सर्व लघु आणि माहितीपटांसाठी समर्पित अशा या दक्षिण आशियातील सर्वात जुन्या चित्रपट महोत्सवादरम्यान म्हणजेच 29 जानेवारी ते 2 फेब्रुवारी या काळात चित्रपटांचे शो आणि इतर संबंधित कार्यक्रम डॉ गणपतराव देशमुख मार्गावरच्या चित्रपट प्रभागच्या (फिल्म्स डिव्हिजन) परिसरात होणार आहेत.

फिल्म्स डिव्हिजनच्या महासंचालक आणि मिफ्फ-2020 च्या संचालक स्मिता वत्स शर्मा यांनी आज पत्रकार परिषदेत या महोत्सवाविषयी माहिती दिली.

सोळावा मुंबई आंतरराष्ट्रीय चित्रपट महोत्सव मिफ्फ 2020 अनेक अर्थाने वैशिष्टपूर्ण ठरणार आहे. स्पर्धा विभागातल्या विविध विषयांवरील चित्रपटांच्या प्रदर्शनासह, माहितीपट आणि ॲनिमेशन क्षेत्रात विशेष उल्लेखनीय कार्य केलेल्या ज्येष्ठ दिवंगत दिग्गजांच्या सन्मानार्थ त्यांना श्रद्धांजली वाहण्यासाठी त्यांच्या चित्रपटाचे विशेष शो आणि प्रदर्शन आयोजित केले जाणार आहे. “रेट्रोस्पेक्टीव्ह पॅकेजेस’ या विभागात अॅनिमेशनपटांच्या चाहत्यांना तीन देशातील जुन्या निवडक ॲनिमेशनपटांचा आनंद घेता येणार आहे. तसेच, आणखी एका विशेष पॅकेजमधून युरोपीय माहितीपटांची संस्कृती उलगडली जाणार आहे. सोळाव्या मिफ्फसाठी जगभरातून येणारे प्रतिनिधी या विषयातील वैविध्यपूर्ण अनुभव आणि समकालीन चित्रपटांची पुरेपूर जाण असणारे आहेत.

मिफ्फ हा जगभरातील माहितीपट आणि लघुपट निर्मात्यांना आकर्षित करणारा महोत्सव आहे. यंदाही या महोत्सवासाठी आलेल्या प्रवेशिकांची संख्या पाहिली असता, या महोत्सवाला मिळालेली लोकप्रियता आणि विश्वासार्हता याचा अंदाज येऊ शकेल. या महोत्सवासाठी यंदा राष्ट्रीय स्तरावर विक्रमी 729 चित्रपट तर आंतरराष्ट्रीय स्तरावर 24 देशांतून 144 चित्रपट प्रवेशिका आल्या आहेत.

ठळक वैशिष्ट्ये:-

मिफ्फ 2020 मध्ये अनेक वैशिष्ट्ये आहेत. यात युरोपीय महासंघातील चित्रपटांसाठी विशेष पॅकेज, फिनलँड, बाल्कन आणि रशियातील अॅनिमेशनपटांचे पॅकेज, ‘फॉव्ह’, ‘डिटेन्मेंट’, ‘नाईट ॲट द गार्डन’ असे ऑस्कर पुरस्कार नामांकित चित्रपट देखील दाखवले जाणार आहेत. ‘कंट्री फोकस’ विभागात आयर्लंडचे सर्वोत्कृष्ट माहितीपट दाखवले जाणार आहेत.

त्याशिवाय, ईशान्य भारतातील निवडक माहितीपट-लघुपट, विविध आंतरराष्ट्रीय चित्रपट महोत्सवात सर्वोत्कृष्ट ठरलेले चित्रपट, सुप्रसिद्ध चित्रपट दिग्दर्शक सत्यजित रे यांचे चित्रपट, ‘सुकुमार रे’, ‘रबिन्द्रनाथ टागोर’, ‘द इनर आय’ आणि सुप्रसिद्ध चित्रपट ‘पिकू’ देखील दाखवले जाणार आहेत. विद्यार्थ्यांनी निर्मिती केलेल्या चित्रपट विभागात, एफटीआयआय/ एसआरएफटीआय/ एनआयडी/एफटीआयटी/ सृष्टी/क्राफ्ट स्कूल/विसालिंग वूड अशा विविध चित्रपटनिर्मिती प्रशिक्षण संस्थांमधील विद्यार्थ्यांनी तयार केलेले चित्रपट दाखवले जातील. इतर वैशिष्ट्यांमध्ये, आयडीपीए द्वारे आयोजित मुक्त व्यासपीठ, “चित्रपट संकलन(फिल्म एडिटिंग) विषयावर बी लेनिन यांची कार्यशाळा,  इंडियन इन्स्टिट्यूट ऑफ ड्रोन्स द्वारे “ड्रोन सिनेमॅटोग्राफी’ या विषयावरील कार्यशाळा, पोलंडचे सुप्रसिद्ध अॅनिमेटर मायकेल डूडो दे विट, कॅनडाचे चित्रपट समीक्षक थॉमस व्हॉ आणि इतर मान्यवरांचे मास्टर क्लासेस होणार आहेत.

त्याशिवाय, महात्मा गांधी यांच्या दीडशेव्या जयंतीनिमित्त तसेच सुप्रसिद्ध चित्रपटनिर्माते सत्यजित रे यांच्या जन्मशताब्दी वर्षाचे औचित्य साधून एक विशेष मूर्ती आणि चित्रप्रदर्शन देखील या महोत्सवात आयोजित करण्यात येणार आहे. त्यासोबतच, मृणाल सेन, राम मोहन, भीमसेन खुराना, व्ही जी सामंत, विजया मुळ्ये, मंजिरा दत्ता या दिग्गज कलाकारांना आदरांजली म्हणून त्यांच्या निवडक कलाकृती या महोत्सवात दाखवल्या जाणार आहेत. आणखी एक विशेष म्हणजे या महोत्सवात काही दिव्यांग विद्यार्थ्यांनी तयार केलेले लघुपट विशेष विभागात दाखवले जाणार आहेत.

मिफ्फमध्ये माहितीपट, लघुपट आणि अनिमेशनपाटांच्या क्षेत्रातील दर्जेदार कलाकृतींचा सुवर्ण आणि रौप्य शंख देऊन गौरव तर केला जातोच; त्याशिवाय, विविध स्पर्धा विभागातील विजेत्यांना आकर्षक रोख बक्षिसेही दिली जातात. 16 व्या मिफ्फ मधील सर्वोकृष्ट चित्रपटाच्या मानाच्या पुरस्काराचे स्वरुप सुवर्णशंख आणि 10 लाख रुपये इतका आहे. तर इतर पुरस्कारांमध्ये एक ते पाच लाख रुपयांपर्यंतचे पुरस्कार, रौप्यशंख आणि प्रमाणपत्र असे स्वरूप आहे. पदार्पणातील दिग्दर्शनासाठीचा ‘दादासाहेब फाळके चित्रनगरी पुरस्कार’ देखील समारोपाच्या दिवशी दिला जाईल. यावर्षीपासून या महोत्सवात सर्वोत्कृष्ट लघुपटासाठीचा पुरस्कार, “जल संवर्धन आणि हवामानबदल” या विषयावरील लघुपटासाठी एक नवा पुरस्कार दिला जाणार असून एक लाख रुपये रोख आणि चषक असे या पुरस्काराचे स्वरूप असेल, अशी माहितीही स्मिता वत्स शर्मा यांनी दिली.

प्रतिष्ठीत डॉ व्ही शांताराम जीवनगौरव पुरस्कारचे स्वरुप 10 लाख रुपये रोख,सन्मानचिन्ह आणि सन्मानपत्र असे असून माहितीपट आणि लघुपट क्षेत्रात उल्लेखनीय योगदान देणाऱ्या ज्येष्ठ मान्यवरांचा या पुरस्काराने समारोप प्रसंगी गौरव केला जाईल, अशी माहिती त्यांनी दिली.

चित्रपटाच्या उत्तम मार्केटींगसाठी चित्रपट निर्माते आणि ओटीटी प्लेअर्स यांच्यात बैठका आणि सुसंवाद घडवून आणण्यासाठी मिफ्फ 2020 उत्तम मंच ठरेल असे मतही महोत्सव संचालक  स्मिता वत्स शर्मा यांनी व्यक्त केले. या पत्रकार परिषदेदरम्यान मिफ्फ संचालकांच्या हस्ते डेलिगेटसाठीच्या मिफ्फ ॲपचेही उद्‌घाटन करण्यात आले. या ॲपद्वारे डेलिगेट्स चित्रपटांसाठी आपले मतही नोंदवू शकणार आहेत. मिफ्फ ॲपची लिंक पुढीलप्रमाणे:- http://onelink.to/miffindia

सर्व नोंदणीकृत डेलिगेट्‌सना परस्परांशी संवाद साधण्यासाठी ॲपमध्ये स्वत:ची व्यवस्था आहे. खालील QR कोडद्वारेही हे ॲप डाऊनलोड करता येईल.

मिफ्फ 2020 चाच भाग असलेल्या आणखी तीन ठिकाणी या महोत्सवादरम्यान चित्रपट दाखवले जात आहेत. त्यात एक, मुंबईत कालिना येथे असलेल्या विद्यापीठ परिसर, मालाडचे देबिप्रसाद गोयंका मॅनेजमेंट कॉलेज आणि पार्ल्याच्या उषा प्रवीण गांधी कॉलेज मधेही काही चित्रपट दाखवले जाणार आहेत. माहितीपट आणि लघुपट क्षेत्रात विद्यार्थ्यांचा सहभाग वाढवण्यासाठी याचा उपयोग होईल. 

डेलिगेट नोंदणी आणि इतर सविस्तर माहितीसाठी www.miff.in  या संकेतस्थळाला भेट द्या किंवा miffindia@gmail.com या मेलआयडीवर संपर्क साधावा..