ऑलमोस्ट सुफळ संपूर्ण मालिकेने गाठला ३५० भागांचा टप्पा
झी युवावरची ऑलमोस्ट सुफळ संपूर्ण ही मालिका प्रेक्षकांच्या पुरेपूर पसंतीस उतरलीये. या मालिकेमधल्या नचिकेत, सई आणि अप्पा केतकर या तीन व्यक्तिरेखांना प्रेक्षकांनी त्यांच्या मनात कायमची जागाही दिली. सई आणि नचिकेत यांच्या प्रेमामधली लपवाछपवी पहाताना प्रेक्षकांनाही मजा येतेय त्यात अप्पांची लुडबूड या मजेमध्ये भरच पाडतेय आणि या सगळ्याचा परिणाम म्हणजे मालिकेला मिळणारा चाहत्यांचा भरघोस प्रतिसाद. पाहता पाहता या मालिकेने ३५० भागांचा यशस्वी टप्पा गाठला आहे.
नुकतंच या मालिकेच्या ३५०व्या भागाचं प्रक्षेपण झालं आणि हा आनंद कलाकारांनी सेटवर साजरा केला. या मालिकेतील सई आणि नचिकेत म्हणजेच अभिनेत्री गौरी कुलकर्णी आणि अभिनेता नचिकेत दामले या आनंदाच्या क्षणी म्हणाले, "ऑलमोस्ट सुफळ संपूर्ण या मालिकेचा ३५०वा भाग नुकताच प्रेक्षकांच्या भेटीस आला. आम्ही असंच प्रेक्षकांचं मनोरंजन करत राहू. सध्या प्रेक्षक मालिकेत सईची नचिकेतवर होणारी चिडचिड पाहत आहेत आणि ती चिडचिड कोणामुळे होतेय हे प्रेक्षकांना जरी ठाऊक असलं तरी आम्हाला ते मालिकेत कुठल्या टप्प्यावर कळेल ते प्रेक्षकांना लवकरच पाहायला मिळेल. प्रेक्षकांचं अविरत प्रेम आणि पाठिंब्यामुळे ऑलमोस्ट सुफळ संपूर्ण या मालिकेने ३५० मालिकांचा यशस्वी टप्पा गाठला. प्रेक्षकांनी आजवर या मालिकेला जो प्रतिसाद दिला असाच पुढेही ते राहतील याची आम्हाला खात्री आहे."
No comments:
Post a Comment